"Эмарк Групп" курулуш компаниясынын директору кармалды

"Эмарк Групп" курулуш компаниясынын директору Чолпонбек Акматов соттун чечими менен камакка алынды. Бул тууралуу Жогорку соттун маалымат кызматынан билдиришти.

Маалыматка ылайык, Бишкектин Октябрь райондук сотунун тергөө судьясынын 12-октябрдагы чечими менен УКМКнын Чүй облусу боюнча башкармалыгынын ага тергөөчүсүнүн өтүнүчү канааттандырылып, А.Ч.К.га карата ушул жылдын 4-ноябрына чейин камакка алуу түрүндөгү баш коргоо чарасы тандалды. Ал Жазаларды аткаруу кызматынын 21-мекемесине (СИЗО-1) камакка алынган.

Ошондой эле ал Кылмыш-жаза кодексинин 222-беренесинин 3-бөлүгү (Кылмыштуу кирешелерди легализациялоо (адалдоо) менен айыпталууда.

Автор: Гүлкайыр Абдиманнап кызы