Мындан ары бала бакчаларда балдардын тамагына акчаны ата-энелер гана төлөйт

Эми бала бакчаларда балдардын тамагына акчаны ата-энелер гана төлөйт. Бул тууралуу бүгүн, 1-ноябрда Финансы министрлигинен билдирди.

"Ата-энелердин эсебинен каржыланган мектепке чейинки билим берүү уюмдарында балдардын тамактануусу боюнча социалдык тармактарда тараган маалыматтар боюнча Финансы министрлиги маалымдайт: 11-августта кабыл алынган “Билим берүү жөнүндө" мыйзамдын 28-беренесинин 6-пунктуна ылайык, “Мектепке чейинки билим берүү уюмдарында тамактанууну уюштуруу ата-энелердин (мыйзамдуу өкүлдөрүнүн) каражатынын эсебинен жүзөгө ашырылат", - деп жазылат анда.

Белгилей кетсек, буга чейин социалдык тармактарда президенттин администрациясына жазылган Финансы министрлигинин каты тарап кеткен. Анда бала бакчаларда балдардын тамактануусуна ата-энелер гана акча бериши керек деп жазылган.