Түркияда тумандан улам 7 унаа кагылышып, 10 адам каза болду

Түркиянын түндүк-батышында жети унаанын катышуусунда жол кырсыгы катталып, 10 адам каза болуп, 59у жаракат алганын TRT Haber агенттиги кабарлады.

Маалым болгондой, кырсык коюу тумандан улам болушу мүмкүн.

Сакария шаарынын башкы прокуратурасы билдиргендей, көзөмөл органы жол кырсыгына катышкан жети унаанын, анын ичинде үч автобустун жана бир жүк ташуучу унаанын айдоочуларын кармоого санкция берди. Буга чейин алты айдоочу кармалган. Жабыркаган бир айдоочу ооруканага жаткырылган, дарылангандан кийин кармалат.

Саламаттыкты сактоо министри Фахреттин Кожа кырсыктын кесепетинен жабыркаган 59 кишинин 8инин абалы оор экенин билдирди.

Аймакта калың туман уланууда жана буга байланыштуу ички иштер министри Али Ерликая айдоочуларды өтө этият болууга чакырды.

Автор: Азат Бейшенбеков