Жээнбек Кулубаев Беларустун элчисин дипмиссиясынын аякташына байланыштуу кабыл алды

Бүгүн, 19-мартта Кыргызстандын тышкы иштер министри Жээнбек Кулубаев дипломатиялык корпустун дуайени, Беларустун Кыргызстандагы элчиси Андрей Страчкону анын дипломатиялык миссиясынын аякташына байланыштуу кабыл алды. Бул тууралуу ТИМден билдиришти.

Маалымдалгандай, сүйлөшүүлөрдүн жүрүшүндө министр Кыргызстан менен Беларустун ортосундагы эки тараптуу мамилелерди өнүктүрүүгө элчинин жасаган иштери жана жеке салымы, Кыргызстандагы дипломатиялык корпустун дуайени катары жигердүү ишмердүүлүгү жана Кыргызстандын ТИМинин кайрымдуулук иш-чараларына туруктуу катышкандыгы үчүн ыраазычылык билдирди.

Ага ылайык, саясий, соода-экономикалык жана гуманитардык чөйрөлөрдө кызматташтыкты кеңейтүүгө багытталган жогорку жана жогорку деңгээлдеги макулдашууларды ишке ашыруунун жүрүшү талкууланды.

"Элчи Андрей Страчко кыргыз тарапка өз милдеттерин аткарууда көрсөткөн колдоосу үчүн ыраазычылык билдирип, Кыргызстан менен эки тараптуу кызматташтыкты мындан ары өнүктүрүүгө көмөктөшүү үчүн мындан ары да күч-аракетин жумшай турганын белгиледи", -деп айтылат маалыматта.