Орусия доллар менен евродон баш тартып, юанга өттү

Орусиянын Борбордук банкы Москва биржасында доллар жана евро соодасы токтогондон кийин валюта рыногу үчүн жаңы эталондук көрсөткүч катары кытай юанынын кабыл алынганын жарыялады.

Акыркы эки жылда орус рыногунда АКШ доллары менен евронун ролу ырааттуу түрдө төмөндөп, соода агымы Чыгышка багыт алды. Учурда Орусиянын тышкы соода төлөмдөрүнүн 80 пайызга жакыны рубль, юань жана башка валюталар менен жүргүзүлөт.

"Май айында Москва биржасынын соодасындагы юандын үлүшү 54 пайызды түздү. Ошентип юань биржа соодасындагы негизги валюта болуп калды. Юань/рубль курсу башка валюта жуптары үчүн траекторияны аныктайт жана рыноктун катышуучулары үчүн таяныч пункту болуп калат", - деп айтылат Борбордук банктын билдирүүсүндө.

Буга чейин АКШ Орусияга каршы оор санкцияларды киргизгени белгилүү болгон: Москва биржасы, Улуттук клиринг борбору (NCC) жана Улуттук эсептешүү депозитарийи (NSD) чектөөлөргө дуушар болгон. Москва биржасы АКШ доллары, евро жана гонконг долларынын соодасын токтоткондугун жарыялап, рубль конвертацияланбаган валюта статусуна бир кадам жакындады.

Ошондой эле Улуу Британия Орусияга каршы санкциялык кысымды кеңейтти, анын ичинде 7 адам жана 35 компания жаңы чектөөлөр пакетинде. Негизги каржы институттары чабуулга кабылды.

Мындан тышкары санкциялар мунай-газ, өнөр жай жана камсыздандыруу тармагындагы бир катар компанияларга, анын ичинде «Ингосстрах» жана суюлтулган газды өндүрүү жана ташуу боюнча НОВАТЭКтин үч долбооруна таасирин тийгизди.

«РБК Инвестиции» агенттигинин маалыматына караганда, санкциялар чет элдик валютага болгон суроо-талаптын күчөшүнө алып келген — 12-июнь күнү кечинде Москванын айрым акча алмаштыруучу жайларында доллар 100 рублдан жогору сатылган. 13-июнда курс турукташып, 99 рублдан төмөн түшкөн.

Автор: Бек Оморбеков