Таласта аман-эсен табылган швейцариялык турист милицияга ыраазычылыгын билдирди (видео)

Таласта аман-эсен табылган швейцариялык турист милицияга ыраазы экенин айтты. Бул тууралуу Ички иштер министрлиги билдирди.

Маалыматка ылайык, кечээ, 16-июнда милицияга "Беш-Таш" улуттук паркына эс алууга чыккан чет өлкөлүк турист дайынсыз болуп жаткандыгы боюнча маалымат келип түшкөн. Айтылган дарекке барган милиция кызматкерлери чет өлкөлүк туристти аман-эсен табышкан.

"Ал 1964-жылы туулган Швейцария өлкөсүнүн жараны Андрейа Мария Хелена экендиги такталды. Ал "Беш-Таш" улуттук паркындагы Жүрөк көлүн көрүүгө өзү жалгыз чыгып, андан ары дагы жогорулап кеткендиги белгилүү болгон. Турист айым жүргөн жер тоолуу болгондуктан телефондо байланышууга мүмкүн болгон эмес", - деп айтылат маалыматта.

ИИМ чет өлкөлүк турист тынчсызданып издегени үчүн Талас милициясына жана өзү жашап жаткан мейманкананын ээсине ыраазычылык билдиргенин кошумчалады.