Израилдин Газага жасаган соккусунан ондогон адам набыт болду

Палестиналык ХАМАС кыймылынын өкүлү ишемби күнү Израилдин Газа шаарынын айрым бөлүктөрүнө жасаган чабуулунан кеминде 42 киши каза болгонун билдирди. Палестина тараптын маалыматы боюнча, Аль-Шати качкындар лагерине кол салуудан 24 киши, Аль-Туффа аймагында дагы 18 киши набыт болгон.

Израил армиясы Газа шаарындагы ХАМАСтын эки аскердик инфраструктуралык объектисине сокку урганын кабарлады. ХАМАС Израилди карапайым элге кол салуулар үчүн айыптады.

Газадагы жаңжал башталгандан бери 37 400дөн ашуун адам каза болуп, анклавдын дээрлик бардык калкы үй-жайсыз калды. Израилдин массалык чабуулу азыр Рафах жана Дейр аль-Балах аймактарына багытталган.

Жума күнү Рафахтын батышындагы Аль-Маваси гуманитардык зонасында 25 палестиналык набыт болгону кабарланган. Палестиналыктардын ырасташынча, танктын снаряды качкындар жайгашкан чатырга тийген.

Эл аралык сот Израилди геноцид кылууда деп айыптап, акыркы чечиминде Тель-Авивге түштүктөгү Рафах шаарындагы операцияларын токтоосуз токтотууга буйрук берген.

Эл аралык кылмыш сотунун прокурору Карим Хан Израилдин премьер-министри Биньямин Нетаньяху менен Израилдин коргоо министри Йоав Галанттын камакка алынышына ордер берүүнү өтүндү.

Автор: Бек Оморбеков