Путин Астанага келди. Аны Казакстандын өкмөт башчысы тосуп алды

Орусиянын президенти Владимир Путин Казакстандын Астана шаарына келди. Аны аэропорттон аталган өлкөнүн премьер-министри Олжас Бектенов тосуп алганын жергиликтүү басылмалар жазышты.

Маалыматка ылайык, анда Путин ШКУнун мүчө-мамлекеттердин башчыларынын кеңешинин кезектеги жыйынына катышат.

Казакстан тараптын төрагалыгы астында өтө турган Кеңештин жыйынына Орусия, Казакстан, Кыргызстан, Тажикстан, Өзбекстан, Кытай, Пакистан, Индия, Беларустун (Беларусь бул отурумда ШКУга мүчө-мамлекет статусун алуу процедурасынын аякташын күтүүдө) башчылары катышат.

Буга чейин ШКУнун кезектеги жыйынына катышуу үчүн Астанага Кытай Эл Республикасынын төрагасы Си Цзиньпин келгени маалымдалган.

Автор: Айжанар Рыспек кызы
Фото: казак басылмалары