Эммануэль Макрондун коалициясынын талапкери Франция парламентин жетектейт

Президент Эммануэль Макрондун "Бирге" коалициясынын талапкери Яэль Брон-Пиве Франция парламентинин төмөнкү палатасынын төрайымы болуп шайланды. Бул тууралуу чет элдик басылмалар жазып чыгышты.

Саясатчы добуш берүүнүн үчүнчү айлампасында 220 депутаттын колдоосу менен жеңишке жеткен. Ал эми анын негизи атаандашы "Жаңы элдик фронттун" талапкери Андре Шассен 207 парламентарийдин макулдугун алса, "Улуттук биригүүсү" партиясынын өкүлү Себастьян Шеню 141 депутаттын добушун алган.

Өлкөнүн мыйзамы боюнча добуш берүүнүн биринчи жана экинчи турунда талапкерлердин бирөөсү да абсолюттук көпчүлүк добуш ала албаса, анда үчүнчү турда добуштардын салыштырмалуу көпчүлүгүн алган талапкер шайланат. Биринчи айлампада Шассен 200 депутаттын колдоосу менен биринчиге чыккан болчу. Бирок бул спикерликке жетишсиз болгон.

Брон-Пиве буга чейин дагы төмөнкү палатаны жетектеп келген.

7-июлдагы кезексиз парламенттик шайлоодо президенттин партиясы солчулдарга утулуп калгандан кийин төрагалыкты сактап калуу күмөн жаратып жаткан. Бийликтин партиясынын жеңилиши өкмөттү отставкага кетүүгө дагы аргасыз кылган.

Автор: Кылымбек Бейшеев
Фото: Интернеттен алынды