Түркиянын Измир шаарындагы токойдо чыккан өрт айылдарга жеткендиги айтылууда (видео)

Измир шаарында токойдо ири өрт кырсыгы катталып, шамалдан улам жалын жай тургундардын үйлөрүнө чейин жеткен. Бул туурасында түрк басылмалары жазышууда.

Маалымдалгандай, Газиэмир жана Бужа райондорундагы токойлуу аймактарда кечээ, 18-июлда өрт чыгып, анын кесепетинен эл аралык аэропорт үзгүлтүккө учураган. Кечке жуук жалын турак жайларга жеткен. Жабыркагандар тууралуу азырынча маалымат жок.

“Өрттү өчүрүүгө 7 учак, 16 тик учак, 35 жердеги техника, 11 суу ташуучу унаа жана төрт бульдозер тартылган. Түркияда жыл сайын жай мезгилинде чоң токой өрттөрү катталат. 2023-жылы өрт бир нече провинцияга таасирин тийгизген. Орусия өчүрүү иштерине жардам берүү үчүн эки учагын жиберген", - деп айтылат маалыматта.