Эрдоган Байден менен Газа жана туткун алмашуу боюнча сүйлөштү

Түркиянын президенти Режеп Тайып Эрдоган АКШнын президенти Жо Байден менен телефон аркылуу сүйлөштү. Анда эл аралык саясаттын жана эки тараптуу мамилелердин маанилүү аспектилери талкууланды. Түрк лидеринин администрациясы сүйлөшүүнүн негизги темасы Газа тилкесиндеги кырдаал болгонун билдирди.

Маалыматка караганда, Эрдоган Нетаньяхунун өкмөтү ок атышууну токтотууну жана тынчтыкты каалабаганын көрсөтүп жатканын баса белгиледи. Түрк лидери ошондой эле ХАМАСтын Саясий бюросунун башчысы Исмаил Ханиянын өлтүрүлүшү ок атышууну токтотуу аракеттерине оор сокку урганын белгиледи. Түрк лидеринин айтымында, Израиль "Газадагы өрттү" бүт аймакка жайылтууну көздөп жатат.

Өзгөчө көңүл Түркияда акыркы убакта жүргүзүлгөн туткун алмашууга бурулду. Президент Байден бул операциянын ийгиликтүү аткарылышы үчүн Эрдоганга ыраазычылык билдирди.

Сүйлөшүү учурунда Түркия менен Америка Кошмо Штаттарынын ортосундагы эки тараптуу мамилелер талкууланды. Эрдоган Түркиянын АКШ менен бардык тармактарда алакасын өнүктүрүүгө даяр экенин билдирди.

Автор: Бек Оморбеков