Ошто аялын сабаган киши ортого түшкөндөрдүн үстүнөн арыз жазды (видео)

Ош шаарында 36 жаштагы жаран мурунку аялын жумушуна барып сабап салганын бүгүн, 6-сентябрда шаардык милиция билдирди.

Маалыматка ылайык, 3-сентябрь күнү түшкө жакын 36 жаштагы киши ашканада иштеген 32 жаштагы мурдагы аялын анын жумушуна барып ур-токмокко алган.

"Ал ортодогу 4 баланын туулгандыгы тууралуу күбөлүктөрүн сурап, балдарын өз айылындагы мектепке окутууну пландаштырып жаткандыгын айткан. Балдардын апасы күбөлүктөрдү берүүдөн баш тарткан. Мындан улам ортодо жаңжал чыгып, күйөөсү аялына кол көтөргөн. Аял менен бирге иштеген ашпозчулар жардамга элди чакырганда жакын жердеги курулушта иштеген адамдар келишип, экөөнү ажыратышкан", - деп айтылат маалыматта.

Ал күнү эркек киши ооруканага түшкөн. Эртеси, 4-сентябрда ал милицияга арыз жазып, ажыраткан эркектер токмоктоп кетишкенин айткан. Бул күнү жабырлануучу аял дагы мурдагы күйөөсүнүн үстүнөн арызданган. Милиция андыктан эки тарапка тең жарааттын оордугун аныктоо боюнча соттук-медициналык экспертиза дайындалганын маалымдады.

Ошодой эле шаардык ички иштер башкармалыгы алар сот тарабынан расмий ажырашышканын белгилеп, аялга коргоо ордери берилгенин кошумчалады.

Бүгүн социалдык тармактарда аялды сабап жаткан эрек кишинин видеосу тарап жаткан болчу.

Эске салсак, 2-сентябрда да Нарын шаарында эркек киши аялынын жумушуна келип, ага бир нече жолу бычак сайган.