Нарында ашканада иштеген аялын бычактап салган жарандын видеосу тарады

Нарын шаарында ашканада иштеген аялын иштеген жерине кирип келип, бычактап салган жарандын видеосу социалдык тармактарга тарады.

Видеодо көрүнгөндөй, ашканада тамак жасап жаткан аялды сырттан кирип келген жаран эч себепсиз эле бычактап баштаганын көрүүгө болот. Аялдын жанындагы иштешкендери качып чыгып, бир нече убакыттан кийин эркек адам келип бычактап жаткан жаранды кармаган.

Нарын облустук ички иштер башкармалыгынын басма сөз кызматы окуя 31-августта саат 11:00 чамасында Нарындагы "Он-Арча" базарынын ичиндеги ашканада болгонун билдирди. Анда 42 жаштагы жаран ашпозчу болуп эмгектенген 41 жаштагы келинчегин ашканада өзү көтөрүп жүргөн бычагы (маки) менен сайып жибергендиги аныкталган.

Жабырлануучу облустук ооруканага жаткырылып, шектүү кармалган.

Учурда тергөө иштери жүргүзүлүп жатат.