Баткенде Кыргыз-Тажик чек арасы боюнча жумушчу топтун кезектеги жыйыны өттү

Баткен шаарында Кыргызстан менен Тажикстандын мамлекеттик чек арасын делимитациялоо жана демаркациялоо боюнча өкмөттүк делегацияларынын укуктук маселелер боюнча жумушчу топторунун жана топографиялык жумушчу топторунун кезектеги жолугушуусу болду. Бул тууралуу бүгүн, 17-сентябрда Министрлер кабинети кабарлады.

Маалыматка ылайык, жолугушуу 11-сентябрдан 17-сентябрга чейин болгон. Бул жолугушуунун алкагында тараптар калган тилкелерде Кыргыз-Тажик мамлекеттик чек ара сызыгынын өтүшүн сыпаттоо боюнча сунуштар менен алмашышты. Ошондой эле кийинки жолугушууну Тажикстандын аймагында улантууну чечишкен.

Кыргыз өкмөтү сүйлөшүүлөр достукта өз ара түшүнүшүү менен өткөнүн кошумчалады.

Буга чейин сентябрь айынын башында эки өлкөнүн делегацияларынын жолугушуусу Тажикстандын Бустон шаарында өткөн.

Эске салсак, 6-сентябрда өлкөнүн тышкы иштер министри Жээнбек Кулубаев кыргыз-тажик чек арасынын 90 пайыздан ашыгы макулдашылганын билдирген. Муну тажик тарап дагы бышыктап, ал өлкөнүн жер башкаруу жана геодезия боюнча мамлекеттик комитетинин төрагасы Ориф Хожазода чек аранын 94 пайыз тилкеси такталганын айткан.

Автор: Кылымбек Бейшеев
Фото: Министрлер кабинети