УКМК Патрулдук милициянын кызматкерлерин кармады (фото)

Транспорт каражатын мыйзамсыз тартып алышкан Бишкек ШИИБдин патрулдук милиция башкармалыгынын инспекторлору кармалды. Бул тууралуу УКМК кабарлады.

Тактап айтканда К.Н.К. жана Р.у.Т. аттуу инспекторлор транспорт каражатын Патрулдук милиция башкармалыгынын айып короо жайына киргизүү аркылуу материалдык пайда табуу максатында жаранды пара катары 27 миң сом берүүгө мажбурлашкан, андан кийин баасы 13 миң долларды түзгөн автоунаасын убактылуу пайдалануу үчүн мыйзамсыз алып коюшкан.

"Козголгон кылмыш ишинин алкагында 16-сентябрь күнү ИИМдин Ички иликтөө кызматынын кызматкерлеринин катышуусунда Патрулдук милиция башкармалыгынын кызматкерлеринин жумушчу кабинеттеринде тинтүү иштери жүргүзүлүп, жыйынтыгында мыйзамсыз иш-аракеттерди жасоо фактысын тастыктаган буюмдар табылып алынган.

Кармалган К.Н.К. жана Р.у.Т. аттуу инспекторлор кылмыш-процессуалдык кодексинин 96-беренесине ылайык, УКМКнын убактылуу кармоочу жайына киргизилди", - деп билдиришти УКМКдан.

Азыркы учурда Бишкек ШИИБдин патрулдук милиция башкармалыгынын түзүмүндөгү коррупциялык көрүнүштөргө тиешеси бар башка адамдарды аныктоого багытталган тергөө-ыкчам иш-чаралар жүргүзүлүүдө.

Автор: Азат Бейшенбеков