Садыр Жапаров Бишкекке кайтып келди

Президент Садыр Жапаровдун Казакстанга 17-сентябрда болгон бир күндүк иш сапары аяктады. Бул тууралуу президенттин администрациясынан кабарлашты.

Сапардын алкагында Садыр Жапаров Астана шаарында “Борбор Азия - Германия” мамлекет башчыларынын экинчи жолугушуусуна катышты.

Ошондой эле ал Германиянын бизнес коомчулугунун өкүлдөрү менен жолугушту. Президент бизнес-делегация мүчөлөрүнүн көңүлүн гидроэлектростанцияларды куруу жана энергиянын кайра жаралуучу булактарын өнүктүрүү жаатында кыргыз тарап менен кызматташуу мүмкүнчүлүгүнө бурду. Анда ал Германиянын логистикалык компанияларына Кыргызстандагы стратегиялык долбоорлорду ишке ашырууга катышууну сунуштады.

Мындан тышкары Садыр Жапаров Германиянын канцлери Олаф Шольц менен жолугушту. Президент Кыргызстандын башкы милдеттеринин бири чет элдик инвестицияларды тартуу жана эл аралык кызматташтыкты бекемдөө экенин баса белгиледи. Кыргызстан германиялык компаниялардын өлкөгө алып келе турган тажрыйбасын жана билимин жогору баалайт.

Андан соң Эгемендүүлүк сарайында Борбор Азия мамлекеттеринин башчылары менен Германиянын Федералдык канцлерин тосуп алуу жана чогуу сүрөткө түшүү аземи болду. Иш-чарага Казакстан, Германия, Кыргызстан, Тажикстан, Түркмөнстан жана Өзбекстандын мамлекет башчылары катышты.