Депутат баласын таштап миграцияда жүргөн ата-энелер тууралуу кабарлай турган мобилдүү колдонмо түзүүнү сунуштады

Бүгүн, 19-сентябрдагы Жогорку Кеңештин жыйынында депутат Марлен Маматалиев миграцияда жүргөн ата-энелердин балдары зомбулукка кабылып жатканын айтып, чет жакка чыккандар тууралуу кабарлай турган мобилдик колдонмо түзүүнү сунуштады.

Ал Алай районунда болгон окуяны эске салды.

"Алайда болгон окуяны наристеге жасалган зордук-зомбулук десек болот. Мындай маселелер кантип токтойт? Мен ойлом, бир мобилдүү колдонмо түзүү керек. Эгерде чек арадан ата-энеси чыгып кетип, 10-20 күндүн ичинде кайтып келбесе ал колдонмо аркылуу Эмгек министрлигине маалымат келет. Анан "ушул үй-бүлөнүн апасы кайтып келе элек, анын балдары эмне болоду?" деген маселе жаралып, Социалдык коргоо департаменти текшерет эле", - деди Маматалиев.

Эске салсак, социалдык тармактарда Москва шаарында мигрант болуп жүргөн өз аялына өчөшүп, баласын тилдеп, аны урган атанын видеосу тараган. Ош облустук милиция ал кармалганын маалымдаган.