Жумгалда окуучуларды мектепке ташуу үчүн эки кичи автобус берилди

Жумгал районунун Миң-Куш, Кең-Суу айылынын окуучуларын мектепке ташуу үчүн эки кичи автобус берилди. Бул тууралуу президенттин облустагы өкүлчүлүгү билдирди.

Кабарга ылайык, ал үчүн райондун өнүктүрүү фондунан 4,5 миллион сом бөлүнгөн.

Белгилей кетсек, Кең-Суу айылында мектеп жок болгондуктан айылдын 30дан ашык окуучусу 15 чакырым алыстыктагы Табылгыты айылындагы И.Орозалиев атындагы орто мектепке барып келип окушат.

Балдарды ташыган эски автоунаа тар жана муздак болгондуктан бир топ ыңгайсыздык жаратчу. Миң-Куш айылынын балдары дагы 3-4 чакырым алыстыкка жөө барып келип окушчу.

Бүгүнкү күндө Кең-Суу айылына жаңы мектеп курулуп жатат. Таза суу системасы киргизилүүдө.

Облус жетекчиси Алтынбек Эргешов Кең-Суу айылына курулуп жаткан орто мектептин курулуш иши жай жүрүп жатканын белгилеп, иш ыргагын тездетүүнү тапшырды.

Автор: Айжанар Рыспек кызы
Фото: Президенттин облустагы өкүлчүлүгү