Иран өзөктүк физиктин өлүмүнө шектелген үч адамды өлүм жазасына кести

Иран 2020-жылдын ноябрында алдыңкы өзөктүк илимпоз Мохсен Фахризадени өлтүрүүгө катышкан деп шектелген үч адамды өлүм жазасына кести. Бул тууралуу чет элдик басылмалар жазды.

Маалыматка караганда, өкүмдү Урмия шаардык соту чыгарган, бирок ал али күчүнө кире элек жана апелляциялык баскычта.

Сот бийлигинин басма сөз катчысы Асгар Жахангирдин айтымында, айыпталуучулар Израилдин пайдасына тыңчылык кылган жана Иранга киши өлтүрүү үчүн колдонулган жабдыктарды аткезчилик кылганы үчүн күнөөлүү деп табылган.

Аталган иш боюнча кармалган сегиз адамдын бул үчөө кол салууну пландоого түздөн-түз катышканы айтылат.

Фахризада Тегеранга жакын жердеги трассада өлтүрүлгөн. Иран анын дароо өлүмүнө Израилди айыптап, Тегеран бомба жана алыстан башкарылуучу пулемет колдонгон деп билдирген. Өлтүрүлгөн учурда окумуштуу Ирандын өзөктүк программасына катышканы үчүн АКШнын санкцияларында болгон.

Автор: Айпери Бакталбек кызы