Суучулдар Ысык-Көлдөн 2 миң метрден ашык тор чыгарышты

Ысык-Көл облусунун Тоң, Түп райондорунда браконьерлердин мыйзамсыз балык уулоосун текшерүү иштери уланууда.

Өзгөчө кырдаалдар министрлигинин берген маалыматына ылайык, суучулдар 11-ноябрдан 12-ноябрга караган түнү Тоңдон балык кармоочу 18 тор, Түп районунан 5 тор чыгарышкан. Алардын жалпы узундугу 2 миң 300 метрди түзгөн.

ӨКМ жарандарды Ысык-Көлгө аяр мамиле кылууга, таза кармоого чакырат.

"Синтетикалык тор балыктардын денесин кыйып, сууда жашап кетүүсүнө тоскоол болот. Андыктан ар бирибиз Ысык-Көлдүн, тоо көлдөрүнүн экочөйрөсүн сактоого, флора-фаунасын өнүктүрүүгө салым кошолу" - деп билдирген министрлик.

Автор: Бурул Турусбекова