Дастан Бекешев өлкөдө баңгизаттын бир түрүн легалдаштыруу керектигин айтты (видео)

Бүгүн, 19-декабрда Жогорку Кеңештин кезектеги жыйынында депутат Дастан Бекешев Укук коргоо кызматтарынан жеңил баңгизаттарды легалдаштырууну ойлонуп көрүүгө чакырды.

Анын айтымында, учурда жаштардын көпчүлүгү баңгизатка тыюу салса да, аны колдонуп жатат. Ошого байланыштуу жеңил баңгизаттарды легалдаштыруу керектигин айтты.

"Адам тыюу салынган нерсеге умтула берет. Ал эми синтетикалык баңгизаттар эң зыяндуу. Учурда аны жаштар дагы деле колдонуп жатышат. "Табигый" баңгизаттар кымбаттап, химиялык баңгизат жеткиликтүү болууда. Ошондуктан өнүккөн өлкөлөрдөгүдөй баңгизаттын жеңил бир түрүнө жашы жеткендерге уруксат берүү жагын кароо зарыл. Эртели-кеч ошого барабыз, бирок, тилекке каршы, көптөгөн адамдардын тагдыры талкалангандан кийин болуп калышы ыктымал", - деди Бекешев.