Бакыт Төрөбаев Кыргызстанда картошканын баасынын көтөрүлүшү боюнча үн катты (видео)

Министрлер кабинетинин төрагасынын орун басары, суу ресурстары, айыл чарба жана кайра иштетүү өнөр жай министри Бакыт Төрөбаев Кыргызстанда картошканын баасын ортомчулар көтөрүп жибергенин айтты. Бул тууралуу ал бүгүн, 4-февралда "Биринчи радиого" маек берип жатып билдирди.

Анын айтымында, өлкөдө картошка жетиштүү деңгээлде бар, жер-жерлерде дыйкандар картошканы дүң баада 30-40 сомдон сатууда.

"Сатуучулар базардагы бааны көтөрүп жиберишти. Бизде бүгүнкү күндө картошканын көлөмү жетиштүү. Дыйкандар 35-40 сомдон сатууда. Алар бул баага ыраазы. Бирок ортомчулар бааны 75 сомго чейин көтөрүп жиберишти. Кечээ эртең менен Ош шаарындагы базарларда картошканын баасы 60 сом болуп жаткан экен, иш-чараларды жүргүзүп 49 сомго түшүрдүк. Алып сатарлар бааны ашыкча кошпош керек. Эң негизгиси биздин дыйкандар жабыр тартпоосу зарыл. Эми кайсы жерде картошканын баасы көтөрүлүп кетсе, ошол жерге картошка алып барабыз", - деди министр.

Белгилей кетсек, буга чейин Суу ресурстары, айыл чарба жана кайра иштетүү өнөр жай министрлиги картошканы убактылуу чет жакка экспорттоого тыюу салууну карап жатканын билдирген.