"Сата албайсың". Министрлик чет өлкөлүк унааларды мыйзамдаштыруу боюнча маалымат таратты

Чет өлкөдөн мыйзамсыз ташылып келди делген унаалар өлкөгө 2025-жылга чейин кирген болсо гана мыйзамдаштырылат. Бул тууралуу Экономика жана коммерция министрлиги билдирди.

Министрлик мекемелер аралык түзүлгөн жумушчу топ өз ишин аяктап, даярдаган сунуштарын Министрлер кабинетинин кароосуна жөнөткөнүн белгиледи.

Мындан тышкары документте төмөнкү чаралар каралган:

Мамлекеттик алым төлөө тартибинде ишке ашырылат;
Легалдаштырылган унааларды сатууга жана үчүнчү жактарга ишеним кат аркылуу өткөрүүгө тыюу салынат;
Транспорт каражатынын техникалык паспортунда көрсөтүлбөгөн адамдарга аны башкарууга уруксат берилбейт.

Эске салсак, өлкө башчы Садыр Жапаров чет элдик номурлуу унааларды мыйзамдаштыруу боюнча жарлыкка кол койгон. Анда мыйзамдаштыруу 3 этап менен ишке ашырылары көрсөтүлгөн. Мындан улам легалдаштырууну жөнөкөйлөтүү үчүн мекемелер аралык жумушчу топ түзүлгөн.

Автор: Кылымбек Бейшеев
Фото: Интернеттен алынды