Зеленский Украина колго түшкөн кытай туткундарынын ордуна эмне каалап жатканын айтты

Украина туткунга түшкөн эки кытай жаранын орус туткунунда жүргөн украин аскерлерине алмаштырууга кызыкдар. Бул тууралуу Украинанын президенти Владимир Зеленский журналисттер менен жолугушууда билдирди.

"Биз даярбыз жана маалыматтарды бердик. Биз колго түшкөндөрдү украин аскерлери менен алмашууга даярбыз. Мен баса белгилегим келет, кечээ кимдир бирөөлөр туткундагы кытайлык жоокерлерди кандайдыр бир бизнеске алмашууга же Кытайдын лидери менен сүйлөшүүгө алмашат деген имиштерди айтты. Бул туура эмес", - деген Зеленский.

УНИАН басылмасынын жазганына караганда, Украина буга чейин орус аскерлеринин катарында Украинага каршы согушуп жаткан Кытайдан келген 155ке жакын жаранды билет. Ошол эле маалда мындай кытай жарандары кыйла көп болушу мүмкүн. Басылманын жазганына караганда, Орусия кытай жарандарын кытайлык социалдык тармактар аркылуу, атап айтканда, TikTok аркылуу ишке алат.

Буга чейин Зеленский Донецк облусунда Орусия тарапта согушкан эки кытай жараны туткунга түшкөнүн билдирип, алардын видеосун жарыялаган.

Автор: Азат Бейшенбеков