Путин Украина эмне үчүн ок атышпоого макул болгонун айтты

Акыркы убактарда Украинанын күжүрмөн активдүүлүгү азайып, жоготуу көп болуп жаткандыктан Украина ок атышпоо келишимине макул болгон. Мындай пикирин Орусиянын президенти Владимир Путин билдиргенин ТАСС агенттиги жазды.

Анын айтымында, Пасха элдешүүсүн адегенде украин тарап "тагдыр менен ойноо" катары кабыл алган.

"Бирок чет жактан акылдуу кураторлор бул элдешүүнү колдобоо Украинага утулуу гана алып келерин айткандан кийин баары өзгөрдү", - деген Путин.

Орус президенти Пасха майрамына байланыштуу 19-апрель саат 18:00дөн 21-апрель саат 00:00гө чейин ок атышууну токтотууну жарыялаган. Ошол эле учурда Путин орус аскерлерин Украинанын куралдуу күчтөрүнүн мүмкүн болуучу мыйзам бузууларына каршы турууга даяр болууга чакырган.

Кийинчерээк Украина бул демилгени колдоп, Орусияга 30 күн бою жарандык инфраструктурага узак аралыкка учуучу учкучсуз учактар менен ракеталык соккуларды жасоодон баш тартууну сунуштаган.

Автор: Азат Бейшенбеков