Министр болгон мурдагы чекисттин орун басары болуп мурдагы депутат дайындалды. Ал ким?

Саламаттыкты сактоо министринин биринчи орун басары болуп Айбек Маткеримов дайындалды.

Маткеримов Жогорку Кеңештин Vll чакырылышына "Ата Журт-Кыргызстан" фракциясынан депутат болгон. Ал 1980-жылы 11-ноябрда Жалал-Абад шаарында туулган.

Жогорку билимдүү. 2005-жылы Иса Ахунбаев атындагы Кыргыз мамлекеттик медициналык академиясын жана 2023-жылы Токтомаматов атындагы Эл аралык университетин аяктаган. 2024-жылы Орусиянын президентине караштуу Орусия эл чарбасы жана мамлекеттик кызмат академиясынын жетекчилер үчүн мамлекеттик башкаруунун чебери адистигин бүтүргөн. Саламаттыкты сактоо министрлигинин Улуттук коомдук саламатттыкты сактоо институтунун медицина-социалдык изилдөөлөр секторунун аспиранты.

Эмгек жолу:

2005-2007-жылдары Ош шаардык перинаталдык борборунда клиникалык ординатор;
2007-2011-жылдары Ош шаардык төрөт үйүнүн акушер-гинеколог дарыгери;
2007-2012-жылдары ОшМУнун Медициналык колледжинин окутуучусу;
2012-2014- жылдары ОшМУнун Медициналык факультетинин окутуучусу;
2011-2013-жылдары Ош шаардык төрөт үйүнүн төрөт бөлүмүнүн башчысы;
2013-2014-жылдары Ош шаардык төрөт үйүнүн башкы дарыгеринин орун басары;
2014-2015-жылдары Жалал-Абад облустук төрөт үйүндө акушер-гинеколог дарыгери;
2015-жылдан 2021-жылдын 17-декабрына чейин Жолдошев атындагы Сузак аймактык ооруканасынын төрөт бөлүмүнүн башчысы;
2019-2020-жылдары Жалал-Абад облустук төрөткө көмөктөшүү чаралар боюнча координатору;
2016-жылдан 2020-жылга чейин Барпы айылдык кеңешинин депутаты;
2021-жылдын февраль айынын баштап "Ата Журт-Кыргызстан" саясий партиясынын төрагасы.

Ачык булактардагы маалыматтарга таянсак, Кыргызстандын эмгек сиңирген дарыгери. Саламаттык сактоонун "Ардактуу кызматкери", "Билим берүүнүн мыктысы", "Финансы-экономикалык иштин отличниги", "Кыргыз Республикасынын мамлекеттик кызматынын отличниги" төш белгилери менен сыйланган. Мамлекеттик жарандык кызматтын 3-класстагы мамлекеттик кеңешчиси. Үй-бүлөлүү, бир кыздын атасы.

Белгилей кетсек, жакында саламаттык сактоо министри Эркин Чечейбаев кызматтан алынып, анын ордуна министрдин милдетин аткаруучу болуп Каныбек Досмамбетов дайындалган. Досмамбетов буга чейин УКМКнын Жалал-Абаддагы башкы башкармалыгынын башчысы болуп иштеген.