Казакстандын экономисттери өлкөдө күйүүчү май кымбаттай турганын божомолдошууда

Казакстанда жакынкы айларда күйүүчү майдын баасы кыйла өсүшү мүмкүн. Бул тууралуу экономисттер билдиришкенин казак басылмалары жазышууда.

Адистердин айтымында, Евразиялык экономикалык союз алкагында күйүүчү май рыногун бириктирүү 2027-жылдан тарта баалардын жогорулашына алып келиши мүмкүн. Учурда Казакстанда бензин коңшу өлкөлөргө салыштырмалуу кыйла арзан.

Экономисттердин божомолу боюнча, баа 70–90 пайызга чейин өсүшү ыктымал. Мисалы, азыр АИ-92 бензининин баасы болжол менен 239 теңге болсо, өсүштөн кийин ал 400–450 теңгеге жетиши мүмкүн.

Ал эми адистердин пикиринде, келечекте Казакстандагы бензиндин баасы коңшу Кыргызстан жана Өзбекстандагы бааларга жакындашы мүмкүн.

Автор: Замира Ниязбекова