Иран Трамптын коркутуусуна жооп кылды

Тегеран Ормуз кысыгын Ирандын душмандары менен байланышкан кемелер үчүн гана толугу менен жапты. Бул тууралуу Ирандын эл аралык деңиз уюмундагы өкүлү Али Мусави билдирди.

The Guardian басылмасынын маалыматы боюнча, Мусави Ирандын душмандарына таандык кемелер кысыктан коопсуз өтө албастыгын айткан. Андан тышкары Мусави Иран Перс булуңундагы коопсуздук маселелери жана деңизчилерди коргоо боюнча Эл аралык деңиз уюмунун алкагында кызматташууга даяр экенин баса белгилеген.

Мурдараак АКШнын президенти Дональд Трамп эгер Тегеран кийинки 48 сааттын ичинде Ормуз кысыгы аркылуу кеме кыймылын калыбына келтирбесе, АКШ Ирандын электр станцияларына сокку урарын билдирген.

Израил менен АКШ Тегеранга каршы аскердик операция баштагандан кийин Ормуз кысыгы Иран тарабынан иш жүзүндө тосулуп калган.