Иран Жакынкы Чыгыштагы АКШ базаларына сокку урганын билдирди

Ирандын аскер күчтөрү Жакынкы Чыгыштагы АКШнын аскер базаларына сокку урганын Ислам революциясынын сакчылар корпусу маалымдады. Бул тууралуу чет элдик басылмалар жазышты.

Тегерандын билдирүүсүндө, бул аракеттер АКШнын президенти Дональд Трамп жасаган билдирүүлөргө жооп катары болгон. КСИР Трамптын акыркы сөздөрүн "каршылыктуу" жана "психологиялык операция" деп баалады.

Буга чейин Трамп АКШ менен Иран акыркы эки күндө "оң жана жемиштүү сүйлөшүүлөрдү" өткөргөнүн айтып, Пентагонго Ирандын энергетикалык объектилерине сокку урууну беш күнгө жылдырууну тапшырганын билдирген.

Бирок Ирандын Тышкы иштер министрлиги бул маалыматты четке кагып, Вашингтондон түз сүйлөшүү эмес, болгону диалог баштоо тууралуу билдирүүлөр гана түшкөнүн белгиледи.

Бул окуя Жакынкы Чыгыштагы кырдаалды кайрадан курчутуп, аймактагы коопсуздукка байланышкан кооптонууларды күчөттү.

Автор: Айзада Кыдырмышева