Айрым мугалимдер 90 миң сом айлык акы алышары айтылды

Президенттин администрациясынын маалымат кызматынын жетекчиси Дайырбек Орунбеков мугалимдердин эмгек акысынын жогорулашынан улам айрымдар 90 миң сом алышарын билдирди.

"Шаардагы эмгек стажы жок жаш мугалим болжол менен 14 миң сом алса, азыр анын айлыгы болжол менен 39 миң сомду түзөт. Салык төлөмдөрү кармалгандан кийин, колуна 32 миң сомдун тегерегинде тиет.

Бийик тоолуу аймакта иштеген, 30 жылдан ашык эмгек стажы бар тажрыйбалуу мугалим мурда болжол менен 65 миң сом алса, азыр анын айлыгы 104 миң сомдун тегерегине жетет. Колуна болжол менен 90 миң сом тиет. Жыйынтыгында мугалимдердин айлыгы орто эсеп менен 35 миң сомдон 100 миң сомго чейин жогорулаган", - деп жазды ал Facebook баракчасына.

Айта кетсек, өлкөдө мугалимдердин айлык акысы 1-апрелден тарта 100 пайызга жогорулатылган. Деген менен окутуучулардын эмгек акысында предметтик сабактарга жараша айырма бар экени айтылып келет.

Автор: Кылымбек Бейшеев