Казакстандын атайын кызматы Нурлан Сабуров боюнча чечим чыгарды

Казакстандын Улуттук коопсуздук комитети куудул Нурлан Сабуровдун аракеттеринен мыйзам бузуу белгилерин тапкан жок. Бул тууралуу Tengrinews басылмасы мекеменин расмий жообуна шилтеме берүү менен билдирди.

Маалым болгондой, Сабуровго карата текшерүү 2026-жылдын февраль айында башталды. Ага казакстандык активист Марат Турымбетовдун прокуратурага жиберген видеосу себеп болгон. Тасмада куудулдун орусиялык "Легион Вагнер Истра" аскердик бөлүгүнө 10 мотоцикл тапшырып жаткан учуру тартылган. Казакстандын Кылмыш-жаза кодексиндеги жалданмачылык боюнча берене 7 жылдан 12 жылга чейин эркинен ажыратууну карайт.

Эскерте кетсек, Орусияда белгилүү болгон стендап куудул Сабуров 6-февралда Бириккен Араб Эмираттарынан Москвага кайтып келген кезде өлкөгө киргизилген эмес. Ага Орусияга 50 жылга чейин кирүүгө тыюу салынганы тууралуу документ берилген.

Автор: Замира Ниязбекова