Иран АКШ менен болгон сүйлөшүүлөрдөн кийинки келишимдин чоо-жайын ачыктады

Ирандын Тышкы иштер министрлигинин өкүлү Эсмаил Багаи Тегеран менен АКШ Ормуз кысыгы аркылуу кемелердин коопсуз өтүүсүн камсыздоо үчүн өзгөчө механизм түзүү боюнча макулдашканын билдирди. Бул тууралуу Tengrinews басылмасы орусиялык РБКга шилтеме берүү менен жазды.

Маалыматка ылайык, сүйлөшүүлөрдө деңиз жолдорунун коопсуздугун камсыздоо негизги темалардын бири болду. Ормуз кысыгы дүйнөлүк мунай ташуусунда стратегиялык мааниге ээ болгондуктан, тараптар бул аймактагы чыңалууну азайтууга кызыкдар экенин белгилешти.

Мунай экспорту жана тоңдурулган активдер талкууланды

Эсмаил Багаинин айтымында, сүйлөшүүлөрдүн жүрүшүндө Иранга мунай сатууга уруксат берүү жана чет өлкөлөрдө тоңдурулуп турган ирандык активдерди бошотуу маселелери да көтөрүлгөн.

Ирандын тышкы иштер министри Аббас Арагчи да социалдык тармактагы билдирүүсүндө сүйлөшүүлөрдүн алкагында бир катар маанилүү маселелер боюнча жылыш болгонун айтты. Анын айтымында, бул процессте Катар менен Пакистан ортомчу катары активдүү роль ойногон.

Иран төрт тараптуу жолугушуудан баш тартты

Ошол эле учурда Тегеран Швейцарияда өтүшү пландалган АКШ катышкан төрт тараптуу жолугушууну улантуудан баш тарткан.

Багаинин айтымында, сүйлөшүүлөр учурунда АКШ тараптан коркутуу мүнөзүндөгү билдирүүлөр жарыяланган.

“Күн абдан узак болду. Төрт тараптуу жолугушуу учурунда АКШнын коркутуу мүнөзүндөгү билдирүүлөрү жарыяланды. Ушундай шартта Иран сүйлөшүүнү улантууга даяр эмес экенин билдирди”, — деди ал.

Документ 18 саат ичинде жарыяланат

Сүйлөшүүлөрдүн негизги бөлүгү аяктаганы менен, техникалык топ 22-июнда ишин улантат.

Маалыматка караганда, сүйлөшүүлөрдөн 18 саат өткөндөн кийин Катар жана Пакистан ортомчулугу менен жетишилген макулдашуулардын негизги пункттарын камтыган документ жарыяланат.

Ошондой эле тараптар Ливандагы аскердик аракеттерди токтотуу маселесин да талкуулашкан. Биргелешкен билдирүүдө Иран менен АКШ ортомчулардын катышуусунда жаңжалды жөнгө салуу боюнча атайын түзүм түзүүгө макул болгону айтылган.

Трамптын билдирүүсү сүйлөшүүгө таасир этти

Буга чейин Al Mayadeen телеканалы ирандык делегация америкалык тараптан Дональд Трамптын коркутуулар үчүн кечирим суроосун талап кылганын билдирген.

Маалыматка ылайык, Трамп Ормуз кысыгы жабылса Иран оор кесепеттерге туш болорун эскерткен. Ушундан кийин Тегеран сүйлөшүүлөрдү убактылуу токтоткон.

АКШ делегациясынын курамында вице-президент Жей Ди Вэнс, президенттин атайын өкүлү Стив Уиткофф жана Жаред Кушнер болгон.

Ал эми Иран тараптан парламент төрагасы Мохаммад Багер Галибаф жана тышкы иштер министри Аббас Арагчи катышкан.

Автор: Максуда Кудайбердиева