Бир күндө жылдызга айланган дарбазачынын апасы уулунун оюнун көрүүгө келди

Кабо-Верде улуттук курама командасы менен Уругвай улуттук курама командасынын беттешинде күйөрмандардын көңүлүн бурган өзгөчө окуялардын бири — дарбазачы Возиньянын апасынын стадиондон уулунун оюнун көргөнү болду. Беттеш АКШнын Майами шаарындагы стадионундо өттү.

Буга чейин Возинья апасы Испанияга каршы биринчи турдагы оюнга виза ала албай калганын айткан. Анын айтымында, сапар жана виза чыгымдары өтө кымбат болгон.

Бул маалымат коомчулукка тарагандан кийин тиешелүү органдар визалык төлөмдөрдү өз мойнуна алып, Возиньянын апасы үчүн АКШга сапар уюштуруп беришкен.

Белгилей кетсек, Возинья Испанияга каршы алгачкы оюнда (0:0) мыкты деңгээлде оюн көрсөтүп, жети сейв жасаган. Анын мыкты аракети үчүн ал беттештин мыкты оюнчусу деп табылган.

Ал эми Уругвай менен болгон беттеш 2:2 эсебинде тең чыгуу менен аяктады. Кабо-Верденин курамынан Ленини менен Варела айырмаланса, Уругвай тараптан Араухо Вильчес жана Каноббио гол киргизишти.

Автор: Максуда Кудайбердиева