Францияда катуу ысыктан 18 адам каза болду

Францияда эки күндүн ичинде катуу ысыктын кесепетинен 18 адам каза болду. Кечээ, 22-июнда өлкөнүн айрым аймактарында күндүз абанын температурасы +40 градустан ашты.

Reuters агенттигинин маалыматына караганда, каза болгондордун арасында эки жана төрт жаштагы эки бала бар. Алар автоунаанын ичинде эсин жоготушкан. Ошондой эле 80 жаштан 95 жашка чейинки үч адам күндүн ысыгы өтүп каза болгон. Дагы 13 адам кооптуу жерлерде сууга түшүп жатып чөгүп кеткен.

Франциянын Бордо аймагында абанын табы +41,9 градуска чейин көтөрүлүп, өткөн жылдын август айында катталган рекорд жаңыланды. Пуатье шаарында температура 41,2 градуска жетип, 1947-жылы белгиленген мурунку рекорддон ашты.

Мындай жагдай Европанын башка өлкөлөрүндө да катталды. Алсак, Испаниянын Сан-Себастьян шаарында абанын температурасы +40 градуска жетти. Reuters Climate Monitor кызматынын маалыматы боюнча, бул көрсөткүч 22-июнга карата шаардын орточо температурасынан эки эседен ашык жогору.