Израил армиясы Ливандын түштүгүндө куралчан топко сокку урду

Израилдин Коргоо армиясы (ЦАХАЛ) бир нече күндүк тыныгуудан кийин Ливандын түштүгүндө жайгашкан куралчан топко абадан сокку урганын билдирди. Бул тууралуу чет элдик басылмалар жазышты.

ЦАХАЛдын маалыматына ылайык, Али аль-Тахер тоо кыркасынын аймагындагы коопсуздук тилкесине жакын жерде аракеттенген куралчан адамдар Израил аскерлери үчүн коркунуч жаратып жаткандыгы аныкталган. Андан соң аскерлер коркунучту жок кылуу максатында коопсуздук тилкесинин түндүгүндөгү бутага сокку жасашкан.

Израил тарап бул адамдарды террористтик топтун мүчөлөрү катары мүнөздөдү.

Буга чейин Израилдин премьер-министри Биньямин Нетаньяху өлкө армиясы Ливандын түштүгүндө коркунучтарды алдын алуу үчүн бардык зарыл чараларды көрүүгө укуктуу экенин билдирген. Анын айтымында, Израил күчтөрү коопсуздук тилкесинде зарыл болгон мөөнөткө чейин калат.

Автор: Айзада Кыдырмышева