Шри-Ланкада түрмөдөгү баш аламандыктан 25 адам каза болду

Кечээ, 6-июлда Шри-Ланкадагы түрмөлөрдүн биринде чыккан кагылышуудан кеминде 25 адам каза болуп, 100дөн ашуун адам жаракат алды. Бул тууралуу чет өлкөлүк басылмалар маалымдашты.

Маалыматка ылайык, каза болгондордун арасында төрт күзөтчү бар. Окуя Негомбо шаарындагы түрмөдө болуп, анда эки баңгизат тобуна тиешелүү туткундардын ортосунда жаңжал чыккан.

Жабыркагандар ооруканага жеткирилип, алардын арасында туткундар жана түрмө кызматкерлери бар. Бийлик бул окуя акыркы беш жылдан ашуун убакыттагы эң ири түрмө баш аламандыгы болгонун билдирди.

Шри-Ланканын түрмө системинде ашыкча толуп кетүү көйгөйү сакталып келет. Өлкөдө 10 миң адамга эсептелген жайларда 39 миңден ашуун туткун кармалууда.