Текебаев Германияда оор абалга туш болгон студенттер менен жолукту (видео)

Кыргызстандын Германиядагы элчиси Өмүрбек Текебаев Бремен шаарына барып, жайкы мезгилдик жумушка барган кыргызстандык студенттер менен жеринен жолукту.

Анын айтымында, немис тарап менен жүргүзүлгөн сүйлөшүүлөрдүн жыйынтыгында келишимде көрсөтүлгөн жана көрсөтүлбөгөн бир катар маселелер боюнча оң жыйынтыктарга жетишилди.

Ошондой эле студенттер 28 календардык күнгө гана кепилдик берилген эмгек келишимдерине кол коюшканы такталды. Буга карабастан, немис тарап аларга жаңы жумуш орундарын табууга аракет көрөрүн билдирген.

"Эң башкысы – балдарыбыз аман-эсен ата-энелеринин алдына кайтып барышы керек. Биз бул маселени аягына чейин көзөмөлдөп, студенттерибиздин мыйзамдуу укуктарынын сакталышы үчүн ишибизди улантабыз",- деди Текебаев.

Эскерте кетсек, буга чейин интернет желесинде Германияга үч айлык жайкы каникул учурунда иштегени барган 150гө жакын кыргызстандык жаштар жумушсуз жана жатаканасыз калуу коркунучуна кабылганы тууралуу видео тараган. Ага байланыштуу студенттерди жиберген жеке компания билдирүү жасап, 150 эмес, 80 студент экенин билдирди. Ошондой эле бардык жагдайлар боюнча иш алып барып жатышканын кошумчалады.