Манас мэриясындагы өбүшкөндөр тууралуу маалымат берилди (видео)

Манас шаардык мэриясынын имаратынын бөлмөсүндө эки адамдын кучакташып, өбүшүп жатканы тартылган видео социалдык тармактарга тарады. Бул тууралуу 6-ноябрда Манас шаарынын мэриясы түшүндүрмө берди.

Мекеменин маалыматына ылайык, видеодогу адамдар шаардык мэриянын, президенттин Жалал-Абад облусундагы ыйгарым укуктуу өкүлүнүн аппаратынын же башка мамлекеттик жана муниципалдык мекемелердин кызматкерлери эмес.

Алар веб-сайттын программаларын иштеп чыгуу үчүн имараттан убактылуу иш бөлмөсүн алган IT адистери экени белгиленди.

Муниципалитет административдик имараттарда коомдук тартипти жана жалпы кабыл алынган жүрүм-турум эрежелерин сактоо зарылдыгын эскертти.

Ошондой эле окуяга укуктук баа берилгенден кийин кошумча маалымат берилери маалымдалды.