Депутат Нурлан Төрөбековду кол тийбестиктен ажыратуу боюнча прокуратуранын сунушун кароо артка жылдырылды

Парламент депутат Нурлан Төрөбековду кол тийбестигинен ажыратуу боюнча Башкы прокуратуранын сунушун кароону кийинки аптага жылдырды. Мындай чечим Жогорку Кеңештин 4-декабрдагы жыйынында кабыл алынды. Жыйында спикер Асылбек Жээнбеков депутаттан кат келгенин айтты. “Нурлан Төрөбеков кол тийбестигинен ажыратуу боюнча маселени кароону кийинки аптага жылдырууну суранып кат жиберди. Азыр ал ооруп жатыптыр”,- деди спикер.

Айта кетсек, Нурлан Төрөбеков жасалма дипломду пайдаланып жүргөнү үчүн айыпталууда. Тактап айтканда, депутатка карата “алдамчылык” жана “документтерди, мамлекеттик сыйлыктарды, штамптарды, мөөрлөрдү, бланктарды колго жасоо, даярдоо, сатуу же алардын жасалмаларын пайдалануу” беренелери боюнча кылмыш иши козголгон. Фактыны иликтеген депутаттык комиссиянын айрым өкүлдөрү депутаттын жасалма диплом менен жүргөнү аныкталганын жакында жарыялашкан эле.

Автор: Жамалидин Парманкулов