"Милиция мени мыйзамсыз камагандыгы үчүн өзүмдү-өзүм өрттөйм" дейт төрт баланын энеси Роза Маманова

Кызыл-Кыя шаарында төрт баласын жалгыз багып келген Роза Маманова Бишкекке келип өзүн-өзү өрттөй турганын SUPER.KG'ге 9-январда билдирди. Өзүнүн айтымында, мындай ойго баруусуна Кызыл-Кыя шаардык милиция бөлүмүнүн кызматкерлеринин ага карата жасаган мыйзамсыз иш-аракеттери түрткү болууда. Анан да белгисиз телефон номерлерден автомат жана снайперлердин сүрөтү келип жатканын айтып кооптонду.

Маалым болгондой, Мамановага Кызыл-Кыя шаардык ички иштер бөлүмү тарабынан 2017-жылдын 4-октябрында Кыргыз Республикасынын Кылмыш-жаза кодексинин 166-беренеси (алдамчылык) менен кылмыш иши козголгон. 2017-жылдын декабрында камакка алынып, 36 күн аталган ички иштер бөлүмдүн убактылуу кармоочу жайында кармалган.

"Кызыл-Кыя шаарынын мурдагы вице-мэри шаардын карамагындагы 1 гектар 76 сотых жерди 2010-жылга чейин эле 350 миң сомго сатып алып койгон. Ал жер сейил бак болгон. Ошон үчүн мен буга каршы чыгып, ал жер кайтарылсын, жок дегенде колунда жок, жерге муктаж болуп жаткан адамдарга берилсин деп чыккам. Прокуратура бул боюнча кылмыш ишин козгоп, сот аны мамлекетке 5 миллион сом төгүү чечимин чыгарган. Бирок менин каршы чыгып жатканым үчүн мурдагы вице-мэрдин жубайы "Роза Маманова шаардык бийликтеги адамдар тууралуу ар кандай сөздөрдү жазып, аларды коркутууда" деп президентке кат жазыптыр. Президенттин тапшырмасынын негизинде Кызыл-Кыя ички иштер бөлүмү тарабынан иш тергелип баштаган.

Бирок тергөө учурунда ал арыздын маңызы өзгөртүлүп кеткен. Тактап айтканда, "Маманова өзүн жактоочу катары тааныштырып, 2016-жылдын июль айында үйдөн көп суммадагы акча каражатынын уурдалышы боюнча козголгон кылмыш иштин ачылышына жардам берем деп 50 миң сом сураган. Анын 10 миң сомун колуна бергем. Бирок алдап кетти" деп арыз жазган. Бул, албетте, тергөө тарабынан жасалмаланган. Себеби мен кылмышты ачууга күчүм жеткидей тергөөчү эмесмин.

Ошентип 2017-жылдын 30-ноябрында мени шаардык ички иштер бөлүмүнө чакырып сурашкан. Эртеси мага издөө жарыялап жиберишкен. Арадан 20 күн өткөндө милиция кызматкеринин чакыруусу менен барсам мени камап коюшту. 36 күн убактылуу кармоочу жайда жаттым.

Кийин соттун чечими менен 1 жылга шарттуу кесилгем. Тилекке каршы, тергөөдө жана сотто бир дагы далил көрсөтүлгөн эмес. Милиция далил жок туруп эмнеге 36 күн камайт, сот эмнеге 1 жылга шарттуу кесип салат? Ошол учурда 4 балам кароосуз калды. 5 жана 8 жаштагы балдарым мугалимдеринин үйүндө болсо, чоң класста окуган эки балам ар кимдин үйүндө күн өткөрдү. Азыр дагы артымдан калбай аңдып жүрүшөт. Милициянын, соттун ушундай мыйзамсыз иш-аракеттери үчүн 15-январда кичинекей баламды алып Бишкекке барганы жатам. Ак Үй алдына барып, 2 литр бензинди чачып өзүмдү-өзүм өрттөйм", - деди Маманова.

SUPER.KG порталы экинчи тараптын да оюн угуп, жарыялоого даяр. Редакция тарабынан байланышуу аракеттери көрүлүүдө.