Бишкектеги өспүрүмдөр мелдешинде Непал курамасы Иорданияны утуп, тайпада 1-орунду ээлеп турат (фоторепортаж)

Бишкектеги Дөлөн Өмүрзаков атындагы стадиондо бүгүн, 16-сентябрда футбол боюнча 4 мамлекеттин өспүрүмдөр командаларынын катышуусунда мелдеш старт алды. Анда алгачкы оюнда Непал менен Иордания курамалары кез келип, оюн 2:1 эсебинде жыйынтыкталды.

Башкы 20 мүнөттө иорданиялыктар ишенимдүү ойноп, бир канча чабуул уюштурушту. Бирок чеберчиликтин жетишсиздигинен алар мүмкүнчүлүктөрдү бошко кетиришти. Оюндун 27-мүнөтүндө Непалдын оюнчулары кезектеги чабуулду уюштуруп, голго айландырышты. Экинчи таймда да Иорданиянын оюнчулары активдүү оюн көрсөтүшкөнү менен, Непал каршы чабуул уюштуруп, алардын айласын кетирди. 69-мүнөттө непалдыктар дагы бир гол жаратышты. Эки голду тең Рейжн Сабба аттуу футболчу киргизди. Иоданиянын оюнчулары 90-мүнөттө гана гол киргизүүгө жетишти. Анда Фарис Билал аттуу оюнчу айырмаланды.

Кыргыз мамлекетинин өспүрүмдөр курамасы бүгүн алгачкы беттешин Оман курамасына каршы өткөрөт. Беттеш саат 20:00дө башталат. Кирүү акысыз.

Алгачкы оюндан кийин Непал курамасы мелдеш жадыбалында 1-орунга чыкты.