Малайзияда өтүп жаткан армрестлинг боюнча мелдеште кыргыз өлкөсүнүн курама командасы ийгиликтерди багындырууда

"Ала-Тоо" биримдигинин президенти Айгүл Акималиева армрестлинг боюнча Дүйнө чемпиондугунда байгелүү орундарга ээ болгон мекендештерин куттуктоодо

Малайзиянын борбору Куала-Лумпур шаарында армрестлинг боюнча Дүйнө чемпиондугу кыргыз жарандары үчүн ийгиликтүү башталды. Бул тууралуу маалымат бүгүн, 1-октябрда эл аралык мелдештин расмий сайтында жарыяланды.

Маалым болгондой, чемпиондукта Кыргыз Республикасынан 17 спортчу ар кандай салмак жана жаш курак категорияларында катышууда. 90 килограммга чейинки салмактагы чеберлердин арасынан сол кол менен күрөшүү боюнча Александр Ли бардык атаандаштарын жеңип, алтын медаль тагынды. Андан тышкары Шахман Сулейманов 60 килограммга чейинки салмакта 18 жашка чейинки өспүрүмдөрдүн арасынан сол кол менен күрөшүү боюнча 3-орунду ээлеп, коло медалга татыды. Ошондой эле 70 килограммга чейинки салмакта аялдар арасында кыргыз жараны Ольга Ярославцева 3-орунду багындырып, коло медалга ээ болду.

Айта кетсек, армрестлинг боюнча Дүйнө чемпиондугу Куала-Лумпурда 27-сентябрдан 3-октябрга чейин өтөт.

Автор: Нургазы Аматов