Тамерлан Козубаев, Валерий Кашуба, Манас Карипов сыяктуу атактуу футболчулар өлкө чемпиону "Алайдын" курамына кошулушту

Тамерлан Козубаев

Манас Карипов

Турнали Рустамов

Валерий Кашуба

Владимир Веревкин (№18)

Өлкө чемпиону "Алай" футболдук клубу АФКнын Кубогунун тандоо турунда ливандык “Триполи” клубу менен беттешет. Беттеш 2016-жылы 9-февралда Ливанда өтөт. Дал ушул оюнда жеңип чыккан команда АФКнын Кубогунун тайпалык баскычына жолдомо алат.

Беделдүү эл аралык мелдешке жолдомо алуу үчүн "Алай" футболдук клубу курамды күчтөөгө өттү. SUPER.KG порталына команданын медиа-офицери Кубанычбек Ураимов билдиргендей, клуб учурда бир катар футболчулар менен келишим түздү. Клуб менен келишим түзгөн жана түзүшү мүмкүн болгон футболчуларга көз салып коюңуз...

Дарбазачылар

Клуб дарбазачы Калыс Акималиев ("Абдыш-Ата" клубунан келди) менен 1 жылга келишим түздү. Ошондой эле улуттук кураманын дарбазачысы Валерий Кашуба (тажикстандык "Худжанд" клубунда ойноп келди) менен 1 оюнга макулдашуу болду. Оюндун жыйынтыгына жараша келишим узартылышы мүмкүн.

Коргоочулар. Улуттук кураманын коргоочусу Тамерлан Козубаев командага кошулат. Тамерлан менен да келишим 1 оюнга гана туураланды. Эгер команда мелдештин кийинки баскычына чыкса же футболчу башка абройлуу клубдан сунуш албаса, келишим узартылат.

Жарым коргоочулар. Команданын катарын Турсанали Рустамов толуктады. Бишкектик "Алганын" курамында ойноп келген футболчу менен келишим 1 жылга түзүлдү. Ошондой эле "Абдыш-Атанын" жарым коргоочусу Манас Карипов "Алайдын" формасын киймекчи.

Чабуулчулар. "Алайда" учурда Алиа Силла аттуу күчтүү чабуулчу бар. Аны менен дуэт түзгөнгө, аны алмаштырганга клуб күчтүү чабуулчу издеп жатат. Азырынча 2 чабуулчу менен сүйлөшүүлөр жүрүүдө. Алардын бири камерундук Арманд Онголо болсо, экинчиси "Абдыш-Атада" ойногон Владимир Верёвкин.

"Буга катар командага Нурбек Жолдошев, Абдурашид Саидрахманов, Абдынур Мамытов сыяктуу футболчулар келип кошулду",- дейт К.Ураимов.

Автор: Максат Кудайбердиев
Фото: Интернеттен алынды