Жарандык көзөмөлдөө комитети: "Бийлик Конституцияны өзгөртүү боюнча Акаевдин технологиясын колдонуп жатабы?"

Жарандык көзөмөлдөө комитети президент Алмазбек Атамбаевге кайрылуу жасап, Конституцияны өзгөртүүгө каршылыгын билдирди.

"Учурдагы Конституция Курманбек Бакиевдин бийликти ээлеп алуусуна каршы Элдик революциянын жыйынтыгы катары жаралган. 2010-жылы бул Баш мыйзамды даярдоодо коомчулук кеңири катышып, процесс Улуттук телеканалдан көрсөтүлгөн. Ал кезде эл бул тарыхый окуяга тиешеси бар экенин сезген. Ошондуктан жарандар Конституцияны коргоп жатышат", - деп айтылат кайрылууда.

"Конституцияга бир топ өзгөртүүлөрдү сунуштап, жарандарга “ооба” же “жок” деген жооп берүү укугун берүү технологиясын Аскар Акаев ойлоп тапкан. Бул - элди алдоо. Революциялык бийлик бул технологияны кайра колдонобу? Көз карандысыз серепчилер, саясий жана коомдук ишмерлер Конституцияга сунушталган өзгөртүүлөр бир саясий топтун жана командаңыздагы адамдардын бийликти сактап калуу аракети экенин айтышты", - деп билдирет Жарандык көзөмөлдөө комитети.

Айта кетсек, Жарандык көзөмөлдөө комитети 2010-жылдын 11-апрелинде түзүлгөн, ага 70тен ашуун бейөкмөт уюмдар кирет. Бул комитет өкмөттүн, Жогорку Кеңештин ишмердүүлүгү боюнча мониторинг жүргүзөт.

Автор: Нургазы Аматов