6 айда Орусиянын "кара тизмесинен" 6700 кыргыз жараны чыгарылса, кайра эле 6500 жаран аталган тизмеге кирип калган

Төлөнбай Кожобаев

Бакыт Адылов

Премьер-министр Соронбай Жээнбеков бүгүн, 24-августта Мамлекеттик миграция кызматынын төрагасы Бакыт Адыловду жана аталган кызматтын Орусиядагы өкүлчүлүгүнүн жаңы дайындалган жетекчиси Төлөнбай Кожобаевди кабыл алды.

Жолугушуунун жүрүшүндө Бакыт Адылов миграция тармагында жүрүп жаткан иштер жана алдыдагы аткарыла турган иш-милдеттер тууралуу маалымат берди. Ошондой эле ал кыргыз жарандарына Орусиянын аймагына кирүүгө тыюу салган "кара тизмедеги" мекендештерибизге укуктук колдоо көрсөтүлүп жатканын билдирди.

“2015-жылы "кара тизмеден" 76 миң кыргыз жараны чыгарылган. Учурда 119 миң кыргыз "кара тизмеде" турат. Акыркы 6 айдын жыйынтыгы боюнча 6700 адам тизмеден чыгарылган болсо, ал эми 6500 жараныбыз кайра эле Орусиянын мыйзамдарын бузгандыгы үчүн "кара тизмеге" түшүп калган”, - деди Бакыт Адылов.

Өкмөт башчы Евразия экономикалык биримдигинин алкагында келишилген документтердин негизинде жана консультациялык жолугушуулардын жүрүшүндө кыргыз жарандарын "кара тизмеден" чыгаруу аракетин көрүүнү тапшырды. Ошондой эле Төлөнбай Кожобаевге бул багытта орусиялык кесиптештери менен биргеликте сүйлөшүүлөрдү жүргүзүп, ишти натыйжалуу алып барууну тапшырды.

“Кыргыз өкмөтү Орусиядагы кыргыз жарандарынын кызыкчылыгын коргоо жана аларга кам көрүү максатында Мамлекеттик миграция кызматынын Орусиядагы өкүлчүлүгүнүн ишин толугу менен колдоп, алардын муктаждыктарын чечүүгө кызыкдар”, - деп белгиледи премьер-министр.

Сооронбай Жээнбеков мындан сырткары чет өлкөлөрдө жашап жаткан мекендештердин эне тилин унутпоосу үчүн атайын курстарды, окутууларды уюштуруу зарылдыгын жана медициналык камсыздандыруу өнөктүгүн карап чыгууну буйруду.

Автор: Жамалидин Парманкулов