Депутат курттаган ундун сатылышы боюнча үн катпаган өкмөткө нааразы

Парламент депутаты Жыргалбек Турускулов курттаган ундун сатылышы боюнча жооп кайтарбай жаткан өкмөткө нааразы. Бул маселени айтып кайрылганына бир аптадан ашканын белгилеген депутат: "Эшектин этин жеген кыргызстандыктар эми курттаган ундан нан жеши керекпи? Массалык маалымат каражаттарында айтылууда, бирок өкмөт көңүл бурбай жатат. Эгерде жооп бербесеңер фактыларды, видеодалилдерди жарыялайм", - деди.

Жогорку Кеңештин 22-сентябрдагы жыйынында аталган депутат Мамлекеттик материалдык резерв фондундагы коррупциялык көрүнүштөр тууралуу маалыматтар чыкканын, фонд курттаган унун карылар үйлөрүнө жана жетим-жесирлерге 16 сомдон сатып жатканын айтып чыккан. Мекеменин кампасында дагы 70 тонна ун калды деген маалымат бар экенин да билдирген эле.

Автор: Автандил Добулбеков