Депутат: "Ата-энелер Болондук билим берүү системин түшүнбөй жатышат"

Студенттердин ата-энелери Болондук билим берүү системин түшүнбөй жатышат. Мындай пикирин бүгүн, 16-декабрда Жогорку Кеңештин КСДП фракциясынын отурумунда депутат Евгения Строкова билдирди.

Анын айтымында, Билим берүү жана илим министрлиги Болондук систем тууралуу түшүндүрүү иштерин жүргүзгөн жок. "Ата-энелер "бакалавриатта 4 жыл окуган соң, сөзсүз түрдө 2 жылдык магистратурада окуш керек" деп ойлошот. Мисалы, Англияда бакалавриаттан кийин магистратурада окуу милдеттүү эмес. Бизде болсо баары магистратурага барып жатышат. Өлкөбүздөгү жогорку окуу жайларда Болондук систем эптеп-септеп киргизилгендиктен ушундай көрүнүш болууда", - деди Строкова.

Айта кетсек, Болондук билим берүү тутуму - бул Европа өлкөлөрүндөгү эки тепкичтүү билим берүү системи. Ага ылайык, диплом алган студент Болондук системге мүчө болгон өлкөлөрдүн биринде өз кесиби боюнча жумуш таап иштей алат.

Автор: Нургазы Аматов