Орусиядагы митингдердин уюштуруучусу Алексей Навальныйга 20 миӊ рубль айып салынды

Москванын Тверск облустук соту оппозиционер Алексей Навальныйды макулдашпай митинг өткөрүүгө күнөөлүү деп таап, ага 20 миӊ рубль айып салды. Орусиялык ММКлар 27-мартта жазышкандай, Навальный өзү митингди уюштуруу мыйзамдуу экенин жана Конституциялык соттун чечимине ылайык келерин билдирди.

"Биз акцияны макулдашуу үчүн Москва бийлигине кайрылганбыз. Мыйзамга ылайык, биз 3 күндүн ичинде макулдашып же башка жерди сунушташыбыз керек эле. Бирок бул болгон жок, анткени Конституциялык соттун чечимине ылайык, биз башында эле сураган жерге акция өткөрүүгө укугубуз бар болчу", - дейт Навальный.

Белгилей кетсек, 26-мартта Орусиянын бир катар шаарларында коррупцияга каршы митингдер өткөрүлдү. Ага Алексей Навальный жүргүзгөн иликтөөлөр негиз болгон. Навальныйдын коррупцияга каршы күрөшүү фонду март айынын башында Орусиянын өкмөт башчысы Дмитрий Медведевге тиешелүү мүлк жана анын катыштыгы бар делген коррупциялык иштер боюнча иликтөөнү жарыялаган эле. Иликтөөгө карата премьер-министр тарабынан реакция болбогону үчүн Навальный орусиялыктарды митингге чыгууга чакырган. Нааразылык акциялары Москва, Санкт-Петербург, Түштүк-Сахалин, Иркутск, Красноярск, Томск, Екатеринбург, Челябинск, Махачкала, Сибирь, Урал жана башка шаарларда өткөрүлгөнү маалым болду. Митингчилер Дмитрий Медведевден иликтөөдө айтылган айыптоолор боюнча жооп берүүсүн талап кылышкан.

Автор: Автандил Добулбеков