Базар-Коргондо 22 адам салатка ууланып ооруканага түштү

Жалал-Абад шаардык санитардык-эпидемиологиялык көзөмөл борборунун маалыматы боюнча Базар-Коргондогу Могол айыл өкмөтүндө 22 адам салатка ууланып, ооруканага түшкөнүн Саламаттыкты сактоо министрлигинин басма сөз кызматы бүгүн, 18-апрелде кабарлады.

Алдын ала жүргүзүлгөн иликтөө иштерине ылайык, жабыркагандардын баары 15-апрелде кыз узатуу тойдо сапатсыз жасалган салатка ууланышкан.

"17-апрелде 8 адам Базар-Коргондогу аймактык ооруканага кайрылышкан. Алар жугуштуу оорулар бөлүмүнө жаткырылып, дарыланып жатышат. Дары-дармектер жетиштүү. Лабораториялык изилдөөгө бейтаптардын ашказаны жуулган суулар алынды, ал эми салаттын калдыктары калган эмес", - деп жазылат билдирүүдө.

Бүгүн, 18-апрелде дагы 14 адам ооруканага жаткырылган.

"Жалпысынан саат 11:30да 22 адам жаткырылды. Экөөнүн абалы орто, калгандарыныкы канааттандырарлык. Жер-жерлерде тамактан уулануу боюнча түшүндүрүү иштери жүрүп жатат", - деп билдиришти министрликтен.

Автор: Үмүт Абдраимова
Фото: Интернеттен алынды