Бүгүн, 12-июлда мамлекеттик "Ала-Арча" резиденциясында президент Алмазбек Атамбаев өлкөнүн социалдык-экономикалык, маданият жана интеллектуалдык тармактарын өнүктүрүүгө салым кошкон 141 кишиге мамлекеттик сыйлык тапшырат. Аземге 133 киши келди. Алар II, III даражадагы "Манас" ордени, "Даңк" медалы, Эмгек сиңирген ишмер, мугалим, дарыгер жана башка мамлекеттик сыйлыктарга ээ болушат.
Президент бүгүнкү сыйлык ала тургандардын басымдуу бөлүгү мугалимдер экенин белгиледи.
"Акыркы жылдары мугалимдердин айлык маянасы 4 эсеге өстү. Биздин мамлекеттик бюджеттин 24 пайызы билим берүүгө жумшалат. Дүйнө боюнча мындай жок. Менин президенттик мөөнөтүм бүтөрүнө аз калды. 3 айдан кийин кетем. Бирок менин мугалимдерге жакшылык кылып кетсем деген жакшы тилегим бар эле. 2-классымда үйгө келсем апам менен биринчи мугалимим чай ичип отурган экен, ошондо мугалим кадимкидей эле адам турбайбы дегем. Ошондуктан бүгүн ушул эл агартуучулардын сыйлык алып жатканына кубанычтамын", - деди президент.
Бир катар маданият кызматкерлерине "КРнын Эл сүрөтчүсү", "КРнын Эл артисти", "Маданиятка эмгек сиңирген ишмер" наамдары берилди.
Геральдика боюнча адис Вячеслав Копотоевге "Кыргыз Эл сүрөтчүсү" наамы ыйгарылды.
"Кыргыз Эл артисти" наамын алгандар:
- Келдибек Ниязов — Кыргыз улуттук филармониясынын артисти;
- Давлетбек Нургазиев — Ысык-Көлдөгү К.Жантөшев атындагы театрдын артисти;
- Алтынбек Сапаралиев — ырчы;
- Зейнеп Шакеева — Эл аспаптар оркестринин солист-вокалисти.
"Маданиятка Эмгек сиңирген ишмер" наамын алгандар:
- Дилбар Ашимбаева — "Dilbar" мода үйүнүн арт-директору;
- Владимир Гуцалов — Панфилов районундагы балдар өнөр мектебинин директору;
- Бактыбек Кыдыкбаев — Улуттук кансерваториядагы үйлөмө жана урма аспаптар кафедрасынын башчысы;
- Набижан Мамажанов — Бабур атындагы Ош мамлекеттик академиялык өзбек драма театрынын директору.
